បែកធ្លាយលោក ម៉ៅ មឿន ប្រធានការិយាល័យភូមិបាលស្រុកបន្ទាយអំពិល យកដីមណ្ឌលសុខភាពតាម៉នសែនជ័យ លក់អស់មួយចំនួនធំ

ខេត្តឧត្ដរមានជ័យ ៖ នៅថ្ងៃទី១៨ ខែមីនា ឆ្នាំ២០២០នេះ មានសេចក្ដីរាយការណ៍មកថា លោក ម៉ៅ មឿន ប្រធានការិយាល័យភូមិបាលស្រុកបន្ទាយអំពិល ថ្លើមធំ​ ហ៊ានកាត់យកដីមណ្ឌលសុខភាពតាម៉នសែនជ័យ​ លក់អស់​ ០១ហិកតា គឺ​ ៥០គុណ២០០ម៉ែត្រ ស្ថិតនៅភូមិតាម៉នសែនជ័យ ឃុំអំពិល​ ស្រុកបន្ទាយអំពិល ខេត្តឧត្ដរមានជ័យ។

សេចក្ដីរាយការណ៍​ បានបន្តថា ដីមណ្ឌលសុខភាពតាម៉នសែនជ័យ មានផ្ទៃដីទំហំសរុប ២០០គុណ២០០ម៉ែត្រ ស្មើនិង៤០០០០ម៉ែត្រការេ​ (បួនម៉ឺនម៉ែត្រការេ)។ ហើយថ្មីៗនេះ​ ត្រូវបានលោក​ ម៉ៅ មឿន ប្រធានការិយាល័យភូមិបាលស្រុកបន្ទាយអំពិល​ កាត់លក់អស់​ ៥០គុណ២០០ម៉ែត្រ។

ប្រជាពលរដ្ឋ​ មានការសោកស្ដាយ​យ៉ាង​ខ្លាំង​ ដោយសូមអំពាវនាវអោយឯកឧត្ដម ប៉ែន​ កុសល្យ​ អភិបាលនៃគណៈអភិបាលខេត្តឧត្ដរមានជ័យ ដកហូតដីនោះ​ ទុកជាសម្បិត្តរដ្ឋវិញ​ មិនត្រូវអោយមន្ត្រីមានតួនាទី​ មានអំណាច​ ធ្វើអ្វីតាមតែអំពើចិត្តនោះឡើយ។

ជុំវិញរឿងរ៉ាវខាងនេះ​ លោក​ ម៉ៅ មឿន​ បានអោយដឹងថា​ លោកបានដោះស្រាយបញ្ចប់រួចរាល់អស់ហើយ។ ចំណែក​ លោក ឃ្លោក ហួត ប្រធានមន្ទីរសុខាភិបាល បានអោយដឹងថា លោក​ ម៉ៅ មឿន ពិតជាបានយកដីលក់មែន គឺមួយចំណែកខាងក្រោយ៕ គេហទំព័រស្រទាប់យុវវ័យ