ល្បីថា លោក អ៊ុក ខេមា ចៅសង្កាត់ទួលសង្កែ២ និងលោក កែវ ចន្ថា មេប៉ុស្តិ៍ទួលសង្កែ២ កំពុងលាក់បាំងទីតាំងសំបុកបនល្បែងភ្នាល់ ចាក់បាល់ស៊ីសងតាមប្រព័ន្ធអ៊ិនធើណេត ដោយយកលេសលួចបង្កប់លេងជ្រកនៅក្រោមស្លាកយីហោទីតាំងណេត២៤ម៉ោងលើ២៤ម៉ោងយ៉ាងមានក្តីសុខសាន្តបំផុត ក្នុងលក្ខណៈទ្រង់ទ្រាយធំ ជាយូរមកហើយនៅក្នុងដែនសមត្ថកិច្ចគ្រប់គ្រងរបស់ខ្លួន ដោយមិនកោតញញើតនឹងច្បាប់ ហើយគេមិនដែលឃើញសមត្ថកិច្ចថ្នាក់ណាចេញមុខទៅបង្ក្រាបម្តងណាទេ ។យោងតាមប្រភពរាយការណ៍ពីប្រជាពលរដ្ឋរស់នៅជិតម្តុំផ្ទះបនល្បែងស៊ីសង និងក៏ដូចពីអ្នកញៀនល្បែងធ្លាប់ចេញចូលលេងទីនោះញឹកញ៉ាប់ បានបញ្ជាក់ឲ្យយើងដឹងថា ផ្ទះមួយកន្លែងដែលគ្មានបំពាក់ស្លាកយីហោ កំពុងបើកប្រព្រឹត្តលួចបង្កប់បម្រើសេវាកម្មលេង ល្បែងភ្នាល់ចាក់បាល់ស៊ីសងតាមប្រព័ន្ធអ៊ិនធើណេតយ៉ាងសកម្មនោះ ជាក់ស្តែង គឺស្ថិតនៅត្រង់ចំណុចផ្ទះលេខ 82J ផ្លូវ355 ក្រុម9 ភូមិអង្គាបុស សង្កាត់ទួលសង្កែ២ ខណ្ឌឫស្សីកែវ ។តាមប្រភពខាងលើដដែលបានបញ្ជាក់ឱ្យយើងដឹងទៀតថា នៅខាងក្នុងផ្ទះសំបុកបនល្បែងស៊ីសងនោះ គេដាក់ពង្រាយកុំព្យូទ័រជាច្រើនគ្រឿងសម្រាប់បង្កប់ប្រព្រឹត្ត បម្រើសេវាកម្មលេងល្បែងភ្នាល់ចាក់បាល់ស៊ីសងតាមប្រព័ន្ធអ៊ិនធើណេតទាំងអស់ ។ប្រជាពលរដ្ឋរស់នៅជិតទីតាំងម្តុំផ្ទះបនល្បែងស៊ីសងខាងលើ ដដែលបាននាំគ្នាចោទប្រកាន់ និងរិះគន់ចំៗទៅលើលោក អ៊ុក ខេមា ចៅសង្កាត់ទួលសង្កែ២ និងលោក កែវ ចន្ថា មេប៉ុស្តិ៍ទួលសង្កែ២ មិនបានយកចិត្តទុកដាក់ខ្ពស់ទៅ លើការងារគោលនយោបាយភូមិ- ឃុំមានសុវត្ថិភាពឱ្យបានល្អនោះទេ បែរជាបណ្តែតបណ្តោយនាំគ្នាលាក់បាំង បើកដៃរក្សាទុកឱ្យមានទីតាំងសំបុកបនល្បែងស៊ីសងពាណិជ្ជកម្មយ៉ាងពេញបន្ទុក យកជើងជាន់ឈ្លីគោលនយោបាយដែលជាបទបញ្ជារបស់ក្រសួងមហាផ្ទៃយ៉ាងពិតប្រាកដ ។ ដោយចាត់ទុកពួកបើកអាជីវកម្មណេតមានលួចបង្កប់ល្បែងស៊ីសងតាមប្រព័ន្ធអ៊ិនធើណេតទាំងអស់នោះជាប្រភពចំណូលរបស់ពួកគេដ៏សប្បាយទៅវិញ ។ ពីព្រោះបនល្បែងខាងលើនោះ ពិតជាមានការបើកដៃពីលោក អ៊ុក ខេមា ចៅសង្កាត់ទួលសង្កែ២ និងលោក កែវ ចន្ថា មេប៉ុស្តិ៍ទួលសង្កែ២ ជាក់ជាមិនខាន ទើបបានជាម្ចាស់ទីតាំងបនល្បែងស៊ីសងខាងលើហ៊ានព្រហើន ចេញមុខប្រព្រឹត្តបើកលេងល្បែងស៊ីសងបានយ៉ាងកាក់កបរលូនបានបែបនេះ ។បញ្ហាខាងលើនេះ សុំឱ្យលោក ឃួង ស្រេង អភិបាលនៃគណៈអភិបាលរាជធានីភ្នំពេញ, លោក ស ថេត ស្នងការនគរបាលរាជធានីភ្នំពេញ លោក ជា ពិសី អភិបាលនៃគណៈអភិបាលខណ្ឌឫស្សីកែវ និងលោក គល់ យី អធិការនគរបាលខណ្ឌឫស្សីកែវ មេត្តាគួរយកចិត្តទុកដាក់ មិនត្រូវបណ្តែតបណ្តោយទុកឱ្យលោក អ៊ុក ខេមា ចៅសង្កាត់ទួលសង្កែ២ និងលោក កែវ ចន្ថា មេប៉ុស្តិ៍ទួលសង្កែ២ នៅបន្តបើកដៃឱ្យកើតមានទីតាំងបទល្មើសបនល្បែងភ្នាល់ចាក់បាល់ស៊ីសងតាមប្រព័ន្ធអ៊ិនធើណេត កំពុងយកលេស ជ្រកក្រោមស្លាកយីហោណេត (Net)២៤ម៉ោងលើ២៤ម៉ោងក្នុងភូមិ ក្រុមខាងលើទៀតឡើយ ។ប្រជាពលរដ្ឋរស់នៅក្នុងមូលដ្ឋានខាងលើ សូមអំពាវនាវដល់ លោក ឃួង ស្រេង អភិបាលនៃគណៈអភិបាលរាជធានីភ្នំពេញ, លោក ស ថេត ស្នងការនគរបាលរាជធានីភ្នំពេញ និងលោក ជា ពិសី អភិបាលនៃគណៈអភិបាលខណ្ឌឫស្សីកែវ និងលោក គល់ យី អធិការនគរបាលខណ្ឌឫស្សីកែវ សំឡឹងមើលកូនចៅដែលជាមន្ត្រីក្រោមឱវាទ ក្នុងនោះមានលោក អ៊ុក ខេមា ចៅសង្កាត់ទួលសង្កែ២ និងលោក កែវ ចន្ថា មេប៉ុស្តិ៍ទួលសង្កែ២ កំពុងងាប់ត្រគាកស្តូកងាកលែងរួច ដើម្បីដាក់បទបញ្ជាកម្ចាត់ដល់ ទីតាំងបនល្បែងស៊ីសងខាងលើនោះឱ្យមានប្រសិទ្ធភាពផង ដូចសារព័ត៌មានយើងបានចង្អុលបង្ហាញស្រាប់ ។ ព្រោះមានល្បែងស៊ីសងនឹងមានបទល្មើសផ្សេងៗកើតឡើង ដូចជាសកម្មភាពចោរលួច ចោរឆក់ ចោរប្លន់ អំពើហិង្សា នៅក្នុងគ្រួសារ ដែលសុទ្ធសឹងតែកើតចេញពីការចាញ់ល្បែងស៊ីសង នេះឯង ដែលឈានទៅបំផ្លាញ ដល់សេចក្តីសុខរបស់ប្រជាពលរដ្ឋទូទៅក្នុងរាជធានីភ្នំពេញ ៕
ចំនួនអ្នកទស្សនា
ព័ត៌មានគួរចាប់អារម្មណ៍
អ្នកដំណើរចំនួន៦៥នាក់និងក្រុមការងារ៦នាក់នៅលើយន្តហោះបានស្លាប់ខណៈបានធ្លាក់នៅរុស្ស៊ី (សហការី)
វីដែអូ